Kandidati për kryetar të Tetovës nga koalicioni Aleanca për Kombin dhe Integrimin (AKI), Bajram Rexhepi, sonte vizitoi lagjen “Jashtë-Vardarit”, ku sipas tij, premtimet e pushtetit aktual janë kthyer në makth për banorët.
Rexhepi theksoi se punimet e nisura për ndërtimin e ujësjellësit janë lënë përgjysmë, duke sjellë pasoja të mëdha për jetën e qytetarëve. “Rrugët janë të dëmtuara, automjetet pësojnë dëme çdo ditë, ndërsa dhjetëra familje janë lënë pa ujë të pijshëm. Ky është realiteti i improvizimeve dhe mashtrimeve të pushtetit aktual,” deklaroi ai.
Sipas kandidatit të AKI-së, Tetova ka nevojë për një qasje të re të menaxhimit lokal: “Më 19 tetor, Tetova do t’i japë fund këtij modeli të dështuar, sepse qyteti ynë meriton punë me plan, përgjegjësi dhe dinjitet për çdo lagje,” u shpreh Rexhepi.
