Rihanna ka humbur një shumë marramendëse prej 36 milionë dollarësh nga një projekt i dështuar mode me Louis Vuitton, sipas dokumenteve financiare të kompanisë së saj britanike, Denim UK Holdings.
Këngëtarja amerikane, 37 vjeçe, lansoi linjën e saj të veshjeve Fenty në vitin 2019, në bashkëpunim me markën franceze luksoze, por projekti dështoi dhe u mbyll në vitin 2021 për shkak të pandemisë.
Për shkak të kufizimeve të udhëtimit gjatë periudhës së Covid-it, Rihanna – e cila ishte e përfshirë drejtpërdrejt si dizajnere – nuk mundi të vizitonte atelienë në Paris apo shtëpitë e modës në Itali që prodhonin veshjet, sipas raporteve asokohe.
Kur u lansua projekti, u zbulua se Rihanna kishte investuar 29,988,000 euro (34.86 milionë dollarë), ndërsa kompania mëmë e Louis Vuitton, LVMH, kishte investuar 30 milionë euro (34.88 milionë dollarë).
Biznesi i regjistruar në Francë kishte emrin tregtar Project Loud France, si një referencë ndaj albumit të pestë të Rihannës, Loud.
Rihanna – e cila ka një pasuri të vlerësuar rreth 1.4 miliardë dollarë – investoi shumën përmes Denim UK Holdings dhe u bë aksionere me 49.99 për qind të kompanisë.
Në vitin 2021, Rihanna dhe LVMH morën një vendim të përbashkët për të mbyllur biznesin e modës, në mënyrë që të përqendroheshin te produktet kozmetike dhe të brendshmet.
Në një deklaratë të përbashkët të asaj kohe thuhej:
“LVMH dhe Rihanna rikonfirmojnë synimin për t’u përqendruar në rritjen dhe zhvillimin afatgjatë të ekosistemit Fenty, me fokus në kozmetikë, kujdes të lëkurës dhe të brendshme”.
Fenty – që mban mbiemrin e plotë të këngëtares Robyn Rihanna Fenty – ishte menduar si një zgjerim i bashkëpunimit të suksesshëm me LVMH në fushën e kozmetikës, duke ofruar një gamë të plotë veshjesh, këpucësh dhe aksesorësh.
Por linja rezultoi e kushtueshme – afro 1,000 dollarë për një xhaketë xhins të mbushur dhe 810 dollarë për një fustan me korse – dhe nuk arriti të tërhiqte interesin e madh që kishin pasur linjat e tjera të saj.
