Projekt-amandamentet e Ligjit për Punë të Brendshme në Maqedoninë e Veriut janë lëshuar në procedurë parlamentare.
Për të siguruar pavarësinë operacionale të policisë, siç theksojnë nga MPB, propozohet që vetëm drejtori i Byrosë së Sigurisë Publike të japë urdhra në fushën e punës operative.
Integriteti dhe depolitizimi i punonjësve në MPB, pavarësia operacionale e policisë, vendosja e detyrimit për raportimin e pasurisë dhe interesave, janë disa nga çështjet që rregullon projekt-amendamenti i Ligjit për Punë të Brendshme. Nga MPB thonë se kjo do të ofrojë një shkallë të lartë profesionalizmi dhe objektiviteti në punë.
Për sa i përket integritetit të punëtorëve, zgjidhja ligjore propozon që kjo çështje të përcaktohet për të gjithë punonjësit në Ministri dhe për kandidatët për punësim. Ndaj, si kusht i ri për punësim, sipas MPB-së, propozohet që kandidati të ketë kaluar testin e integritetit.
Por edhe punonjësit apo policët ekzistues propozohet që të përfshihen në testin e integritetit profesional.
Rezultati mund të jetë pozitiv ose negativ. Rezultati negativ është paraparë si rast më i rëndë për përgjegjësi disiplinore dhe bazë për fillimin e procedurës disiplinore.
Siç shtojnë nga MPB-ja, ndryshimet e propozuara në ligj e ndalojnë një punonjës të Ministrisë të jetë anëtar i partisë politike, gjë që siç thonë kjo nuk ka ndodhur deri më tani, por me ndryshimet e reja parashikohet që të ketë përgjegjësi më të rëndë disiplinore.
Për sigurimin e pavarësisë operacionale të policisë, propozohet që vetëm drejtori i Byrosë së Sigurisë Publike të japë urdhra në fushën e punës operative.
Sipas propozim-amendamenteve në Ligjin për Punë të Brendshme, kandidatët me rastin e nënshkrimit të marrëdhënieve të punës obligohen që të japin deklaratë mbi gjendjen pasurore dhe të interesave. (INA)
