Një rrugë në komunën e Çairit mori emrin “Sulë Hotla”, e cila u promovua nga kreu i kësaj komune, Visar Ganiu me bashkëpunëtorë dhe qytetarë.
Por për këtë ka reaguar një shoqatë maqedonase e quajtur “NOV ASNOM” (ASNOM-i i ri) që përbëhet nga veteranë partizanë të Luftës së Dytë Botërore dhe përkrahës të tyre, përcjell INA.
Kjo shoqatë akuzoi rëndë duke theksuar se Sulë Hotla ka qenë një bashkëpunëtor besnik i fashistëve bullgar dhe gjerman.
“Shoqata ‘NovASNOM’ dënon ashpër partinë politike shqiptare BDI dhe kryetarin e komunës Çair, Visar Ganiu për emërtimin e një rruge me emrin e bashkëpunëtorit nazist Sul Hotla. Një akt i tillë është ekzaltim i idesë së Shqipërisë së madhe dhe do të thotë rehabilitim i nazizmit në Maqedoni. Ky është vetëm një hap në serinë ku po ringjallen bashkëpunëtorët e shqiptarëve nazistë që luftuan për një Shqipëri të madhe, duke therur maqedonasit e mendimit të lirë, në kurriz të territorit të Republikës së Maqedonisë.
Ky akt i partisë politike shqiptare BDI në Republikën e Maqedonisë është edhe një konfirmim se ata janë burim i intolerancës ndëretnike dhe janë “gjenerues” për thellimin e hendekut mes komuniteteve në Maqedoni, por edhe kërcënim serioz për paqen dhe stabilitetin e vendit tonë”, thuhet në njoftimin e shoqatës “NovAsnom”, shkruan portali Denesen. (INA)
