Ministri i Shëndetësisë komentoi sot thirrjen e djeshme që ai ua bëri disa profesorëve nëpërmjet rrjetit social, duke nënvizuar se nuk ekziston ndonjë protokoll për ftesat. Sipas tij nuk ka rëndësi mënyra e ftesës.
“Gjatë kësaj dite deshëm ta shfrytëzojmë të flasim për gjëra pozitive, të nesërmen e lamë që të flasim për Komisionin. Megjithatë, ftesa është publike deri tek të gjithë ekspertët, ndërsa dje përmes një postimi në FB, në mënyrë të drejtpërdrejtë iu bëra thirrje tre profesorëve eminent. Në këtë moment në të cilin gjendemi nuk duhet të përplasemi, të debatojmë për mënyrën e ftesës, por të punojmë të gjejmë një zgjidhje si të dalim nga kjo situatë”, tha Bekim Sali, ministër i shëndetësisë.
Ministri Sali i pyetur rreth masave të reja eventuale, u shpreh i prerë se nuk do të ketë masa të reja.
“Për momentin nuk ka nevojë për masa të reja, vazhdojmë me masat që janë në fuqi aktualisht”, u përgjigj Sali.
