Një zëdhënës i Departamentit të Shtetit Amerikan i tha Zërit të Amerikës se e ardhmja e Maqedonisë së Veriut është në BE dhe se SHBA vazhdon të mbështesë integrimin e plotë euroatlantik të vendit.
“Ne i bëjmë thirrje Bullgarisë dhe Maqedonisë së Veriut që të de-përshkallëzojnë retorikën e tyre dhe të zgjidhin shpejt këto mosmarrëveshje dypalëshe,” i tha Zërit të Amerikës një zëdhënës i Departamentit të Shtetit, duke iu përgjigjur pyetjes se si e komentoi vendimin e Bullgarisë për tërheqjen e ambasadorit bullgar nga Shkupi, përcjell INA.
Bullgaria tërhoqi ambasadorin e saj javën e kaluar pas sulmit ndaj sekretarit të klubit bullgar “Borisi i Tretë” në Ohër, me pretendimin se ekziston një “situatë serioze për të drejtat e bullgarëve në Maqedoninë e Veriut”.
Ministri i Punëve të Jashtme Bujar Osmani më pas tha se tërheqja e ambasadorit bullgar ishte një veprim i pabazuar, i paargumentuar dhe joparimor. Por, MPJ bëri të ditur dje se ambasadori bullgar Angelov i është kthyer detyrës në Shkup. (INA)
