Marrëveshja e Ohrit solli atë që në atë kohë ishte më së shumti e nevojshme, paqen. Me patriotizëm të përbashkët, do të ndërtojmë jetë më të mirë, nën kulmin e përbashkët. Kështu deklaroi kryeministri Hristijan Mickoski në seancën solemne të Qeverisë të organizuar për shënimin e 23 vjetorit të Marrëveshjes së Ohrit.
Zv/kryeministri i parë, Izet Mexhiti, në këtë seancë tha se qeveria e re nuk ka vetëm fjalë por edhe vepra. Ai falënderoi kryeministrin dhe qeverinë e re për 1 miliard euro e ndara për komunat dhe për decentralizimin i cili, sipas Mexhitit, është shtyllë e marrëveshjes së Ohrit, e cila do të zgjidh shumë probleme esenciale në komunat tona, në vendbanimet tona dhe do të jetë në funksion të ngritjes së cilësisë së jetës së qytetarit të RMV-së. Për decentralizimin, numri dy i Qeverisë foli edhe në panel diskutimin që u organizua për shënimin e këtij përvjetori. Tha që komunat duhet të jenë gjeneratorë të zhvillimit dhe jo akumulues të problemeve.
Sipas Mexhitit, fondi i ndarë prej 1 miliardë euro për komunat, do të sjellë përfitime të drejtpërdrejta për komunitetet lokale, duke përmirësuar infrastrukturën dhe shërbimet e ofruara për qytetarët, dhe për të gjitha komunat.
