Nuk ka zgjidhje dhe tejkalim të situatës së tendosur në komunën e Haraçinës, pas një mosmarrëveshje tensionuese midis kryetarit aktual, Ridvan Ibrahimi dhe ish-kryetarit Brahim Ajvazi. Ky i pari thotë se ndjehen të kërcënuar, ndërsa Ajvazi ka theksuar se nuk ka asgjë të vërtetë.
Sipas këtij të fundit në këtë situatë duhet të ndërhyjë kryetari i BDI-së, Ali Ahmeti, për të zgjidhur një mosmarrëveshje që siç thuhet ka të bëjë me një tokë të ndarë nga komuna.
Megjithatë, në këtë situatë të tensionuar, masat e ndërmarra nga autoritetet është që të evitohet çdo kontakt midis dy krerëve të komunës, përcjell INA.
“Masa kujdesi, obligim që të paraqitet në polici, ndalesë për të vizituar hapësirat e Komunës së Haraçinës, si dhe ndalesë për t`iu afruar dhe kontaktuar me Kryetarin e Komunës së Haraçinës”, ky është propozimi i dorëzuar nga Prokuroria Themelore Publike në Gjykatën Penale për 69-vjecarin nga Haraçina, siç percjell KlanM.
Sipas Prokurorisë, 69 vjeçari pasi nuk e kishte gjetur kryetarin në zyrë, e ka takuar në oborr, ka nisur ta ofendojë dhe ta kërcënojë. Sipas Prokurorisë, ai ka kryer veprën penale – Dhunë konform nenit 386 paragrafi 1 të Kodit Penal. Por, Ajvazi për TV21 mohon të ketë kërcënuar kryebashkiakun.
Kryetari i Komunës së Haraçinës gjatë të enjtes njoftoi se për shkaqe sigurie mbyllet Komuna e Haraçinës. Autoritetet e kësaj Komune thanë se janë të kërcënuar dhe për disa ditë nuk do të punojë administrata komunale.(INA)
