Në Tetovë u ndezën flakët e një tjetër suksesi historik. Shkëndija u kurorëzua kampione e Maqedonisë së Veriut për herë të pestë, duke vendosur një tjetër gur themeli në historinë e saj të lavdishme. Edhe pse humbën në ndeshjen e fundit të sezonit ndaj Sileksit me rezultat 1-3, kuqezinjtë e Jeton Beqirit e kishin mbyllur llogarinë e titullit më herët – me 70 pikë në 33 ndeshje.
Kjo disfatë e fundit ishte veçse statistikë, pasi gjithë fokusi ishte te trofeu dhe festa që e pasoi. Në përfundim të ndeshjes, shpërtheu një festë e merituar në kampin tetovar, ku ndjesitë dominuan mbi rezultatin. Ceremonia e dhënies së titullit solli emocion, krenari dhe kujtime të sezoneve të kaluara, ndërsa në tribunë ishte i pranishëm edhe Agim Ibraimi – drejtori sportiv i Tiranës dhe njëherësh këshilltar i presidentit të federatës maqedonase të futbollit.
Në sfondin e festës, nuk munguan “Ballistët” – zemra e zjarrtë e tribunes. Edhe pse këtë herë me një prezencë më të vogël se zakonisht, zëri i tyre i fuqishëm mbajti peshën e traditës, duke i dhënë kuptim çdo momente.
Shkëndija mbyll një kapitull të artë, por gjithashtu hap një tjetër: ai i përgatitjes për garat evropiane dhe mbrojtjen e titullit sezonin e ardhshëm. Me pesë tituj në histori, Tetova ka arsye të ëndërrojë edhe më shumë.(INA)
