Medai Shaholli
Edhe në këtë përvjetor të Alfabetit të Gjuhës Shqipe për fajin e politikanëve të papërgjegjshëm, shtëpia muze na del të jetë me bashkëpronarë sllavë dhe shitës arkivolesh apo agjenci funerale dhe të varrmihësve.
Në çdo përvjetor pushtetarët shqiptar kapërdisen në shtëpinë e Alfabetit për ta kujtuar këtë ngjarje dhe datë të shënuar të trashëgimisë historike dhe të kulturës sonë kombëtare pa u kujtuar se ajo nuk është muze me tapi dhe testament por qëndron si tokë e askujt në qytetin e Shkronjave Shqip të Manastirit!
Instituti i trashëgimisë kulturore në Shkup si ent që duhet të merret me mbrojtjen dhe ruajtjen e Shtëpisë Muze të Alfabetit Shqip nuk i bie ndër mend për këtë muze veç në çdo përvjetor të tij dhe jo për pronësin e saj që duhet blerë.
Fundja ata kanë të drejtë t’i bëjnë thirrje Ministrisë së Kulturës ta shpallin Shtëpinë e Alfabeti objekt të rëndësisë së veçantë të trashëgimisë kulturore të shqiptarëve duke e blerë atë nga uzurpatorët varrmihës.
Nga ana tjetër shteti shqiptar apo ‘njerka Shqipëri’ nuk do t’ia di se ka një monument të kulturës shqiptare që është katandisur si mos më keq nga autoritete lokale, duke e lënë qëllimisht me bashkë pronarë varrmihës këtë objekt të kulturës shqiptare dhe se ai duhet të blihet nga shteti shqiptar dhe të ruhet e të mbrohet si monument i trashëgimisë historike dhe kulturore të kombit shqiptar!
Ndaj, pushtetarë shqiptarë, ministra dhe deputetë, përfaqësues të kulturës dhe më gjerë, mos shkoni në Shtëpinë e Alfabeteti sa për sy e faqe, por thirrni ndërgjegjes kombëtare dhe mos e lini atë muze të historisë sonë kombëtare ta përvetësojnë varrmihësit e agjencive funerale dhe e zgjidhni atë problem të bashkëpronësisë, duke e blerë me tapi përfundimisht si pronë të kulturës shqiptare, në të kundërtën do t’ju dënojë historia.
