Asnjë penalitet nga shteti nuk i është paguar konsorciumit “Behtel dhe Enka” për ndërtimin e seksioneve të korridoreve 8 dhe 10D, pohon zëvendëskryeministri i parë dhe koordinator për ndërtimin e korridoreve 8 dhe 10d Artan Grubi.
Ai sot iu përgjigj pyetjes së deputetes së VMRO-DPMNE-së Gordana Siljanovska-Davkova lidhur me thirrjet që i bën për punësim në konsorciumin “Behtel and Enka”, i cili sipas deputetes është menaxher dhe zëdhënës i një kompanie private me paratë e taksapaguesve.
“Më kujtohet në të kaluarën, në mos gaboj, në tre mandatet që ka pasur VMRO-DPMNE nga viti 2006 deri në vitin 2017, me çdo investim të huaj, a nuk ka thënë kryeministri i atëhershëm, ministri i financave apo dikush tjetër për 1000 vende të reja pune dhe u bënë thirrje qytetarëve që të punësohen në ato kompani, në zonat industriale dhe ekonomike. Pra, ishte një fushatë e tërë e gjithë Qeverisë së Vmro-së për hapjen e vendeve të punës në sektorin privat dhe u bënë thirrje qytetarëve që të punësohen. Asgjë nuk ndryshon me këtë projekt, i cili financohet nga shteti dhe që mundëson mbi 2000 vende të punës për qytetarët tanë”, tha Grubi.
Ai kërkoi që deputetët e VMRO-DPMNE-së t’u bëjnë thirrje qytetarëve që të aplikojnë për vendet e punës që kërkon konsorciumi “Behtel dhe Enka” për ndërtimin e katër autostradave në vend.
Në lidhje me atë nëse konsorciumit i janë paguar penalitete nga shteti, ai theksoi se të dhënat janë publike dhe janë të disponueshme në ministritë kompetente dhe në Ndërmarrjen Publike për Rrugë Shtetërore (NPRRSH).
Deputetja Siljanovska-Davkova i është përgjigjur zëvendëskryeministrit të parë në Qeveri, Grubit, se edhe ai ka qenë në të njëjtën qeveri me VMRO-DPMNE-në, duke i thënë se duhet ta mbrojë të mirën e përbashkët, e jo të sillet sikur të jetë i punësuar në konsorciumin “Behtel dhe Enka”.
