Kryetari i komunës së Shuto Orizarit, Kurto Dudush, të premten (22 nëntor) nga ora 13:30 ka paralajmëruar protestë para ndërtesës së Qytetit të Shkupit. Shkak i protestës është bërë përkeqësimi i situatës me transportin publik, i cili sjell probleme të mëdha për qytetarët.
– Ne përballemi çdo ditë me të njëjtin problem – njerëzit presin me orë të tëra në stacionet e autobusëve. Nuk mund të lejojmë që fëmijët, gratë dhe të moshuarit tanë të vuajnë në këto temperatura minus, pas dy-tre orësh duke pritur autobusin, i cili mund të vijë ose jo – tha Dudush në një video në profilin e tij në Facebook.
Ai shtoi se protesta do të jetë paqësore dhe u bëri thirrje të gjithë qytetarëve, pavarësisht përkatësisë etnike, të bashkohen, sepse problemi me transportin publik prek gjithë qytetin.
– Ky nuk është problem vetëm i Shuto Orizares. Ky është një problem që i prek të gjithë qytetarët e Shkupit – theksoi Dudush.
Ai shprehu shpresën se protesta do të nxisë reagimin e institucioneve kompetente dhe se do të merren masa për përmirësimin e transportit publik në kryeqytet.
Banorët e Shuto Orizares përballen me sfida të mëdha për shkak të mungesës së transportit publik, sidomos në javët e fundit të ftohta.
Pamundësia për të shkuar në kohë në punë, në shkollë apo te mjeku i detyron qytetarët të kërkojnë zgjidhje alternative, siç është ndarja e kostos së taksive, gjë që rëndon ndjeshëm buxhetin e tyre.
