Opinionisti dhe profesori universitar, Arsim Sinani ka dal në mbrojtje të kryeparlamentarit të RMV-së, Afrim Gashi pas akuzave ndaj këtij të fundit, për shkak të pjesëmarrjes në një eskortë dasme familjare për në Kosovë.
“Dëgjoj se po e sulmojnë pareshtur Afrim Gashi-n kryeparlamentarin e Kuvendit të Maqedonisë veriore. Një sulm brutal nga të gjitha anët, frontalisht, para dhe pas shpine si në mesjetë. Tu rikujtoj se jo vetëm veturën që do ta përdor, por edhe helikopterët, anijet, dhe të gjitha gjërat që me protokolle i takojnë, si një nga tre figurat kyçe, në Maqedoni Veriore. Lipset të gjithë të mësohen se kryetar i Parlamentit është Afrim Gashi, na pëlqen apo nuk na pëlqen, siç kanë qenë:
Andovi, Klimovski, Mitrevski, Xhaferi, Velanoski, Petkovski, Starova, Mladenovski, Lahtova, Stankovski, Talevski, Minçev, Haxhivasilev-Jasmin, Smilevski-Bato, Arsov, Kolishevski, Stojavov-Mire, Nestorov, Spirov, Çento.. Për ata që pas kuintave i fërkojnë duart i kujtoj se do dështojnë”, ka nënvizuar Sinani.
Nga Kabineti i kryeparlamentarit thonë se udhëtimi i djeshëm i kryetarit të Kuvendit Afrim Gashi në Kosovë, ka qenë në përputhje me të gjitha procedurat e parapara sipas ligjit. Po ashtu u theksua se për udhëtimin në kohë është njoftuar edhe MPB-ja dhe MPJ-ja.
“Më 17 gusht 2024, Kryetari i Kuvendit, së bashku me familjen e tij, ka udhëtuar për në shtetin fqinj, në Kosovë. Kjo vizitë ka qenë tërësisht transparente dhe i ka respektuar të gjitha procedurat e nevojshme të sigurisë. Para nisjes janë njoftuar Ministria e Punëve të Brendshme dhe ajo e Jashtme dhe është dorëzuar gjithë dokumentacioni i nevojshëm sipas protokollit për çdo zyrtar që largohet nga vendi.
Autoritetet kompetente mund ta konfirmojnë këtë informacion, se të gjitha procedurat janë në përputhje me përgjegjësitë dhe detyrimet e Kryetarit të Kuvendit”, theksuan nga kabineti i tij.(INA)
