Mevludin Sinani prej sot ka nisur detyrën e zëvendësdrejtorit në Drejtorinë e të Ardhurave Publike, si një kuadër i propozuar nga krahu i ASH-së i Ziadin Selës, ndërsa pak ditë më parë është shkarkuar nga ky post, Tahir Bexheti, i cili u radhit në përkrahje të krahut të ASH-së së Arben Taravarit.
Sinani është propozim që vjen nga komuna e Likovës dhe se ai ka bërë një postim në rrjetet sociale,
“Prej sot po filloj një përgjegjësi të re, si zëvendës drejtor në Drejtorinë e të Ardhurave Publike.
Jam i nderuar me besimin e dhënë nga drejtuesit e Aleancës për Shqiptarët dhe njëkohësisht ndjej përgjegjësi që këtë detyrë ta kryej faqebardh, me nder dhe dinjitet. Do të përkushtohem që mos të ju zhgënjej as juve dhe as qytetarët. Do të jem në shërbim të vendit, qytetarëve dhe institucioneve, në frymën që kemi ndjekur deri më tani, pastër dhe me krenari”, ka shkruar Sinani.
Ndërsa, zëvendësdrejtori i larguar Tahir Bexheti është nga Piroku i Tetovës. Ai me rastin e largimit nga kjo detyrë ka përcjellë një porosi përmes rrjeteve sociale.
“Ndjehem krenar për këtë periudhë që kam udhëhequr një ndër institucionet më kyçe në Republikën e Maqedonisë së Veriut.
E ushtrova detyrën time, me profesionalizëm dhe me dinjitet, shpresoj që edhe pasardhësi im i emëruar nga Kryeministri teknik të kryej këtë veprimtari po aq me profesionalizëm si që ja dola unë bashkë me bashkëpunëtorët e mi.
I falemenderoj të gjithë ata që më dhanë mbështetje dhe forcë që un sot të jem krenar dhe faqebardhë për punën e bërë me nderë dhe përkushtim, duke mos shkelur asnje kod etik, moral dhe profesional. Na prift e mbara!”, ka shkruar Bexheti. (INA)
