Përveç bukës, çmimin e së cilës qeveria e ka ngrirë në 33 denarë, sot pritet ngrirje e re e çmimeve për disa produkte ushqimore.
Ministri i Ekonomisë Kreshnik Bekteshi njoftoi dje se do të merret vendim për ngrirjen e çmimeve të makaronave dhe produkteve të qumështit.
Me vendimin që pritet të merret nga Qeveria, makaronat, spageti, djathi i bardhë, qumështi, gjiza dhe produkte tjera të qumshtit do të jenë më lirë.
Makaronat, sipas ministrit Bekteshi, do të bëhen më të lira për të paktën dhjetë për qind, ndërsa për produktet e qumështit, prodhuesit do të duhet të presin deri sot për t’u përgatitur sepse, siç tha ai, disa tashmë po i ulin vetë çmimet.
“Qytetarët të jenë të qetë, do të ulen çmimet jo vetëm për këto produkte. Ne do të vazhdojmë me të gjitha produktet ku analizat do të tregojnë se ka fitime apo marzhe më të mëdha se ato që janë të rregullta”, theksoi dje Bekteshi.
Siç njoftoi Bekteshi, pritet që gjatë ditës së bashku me kryeministrin Dimitar Kovaçevski të informojnë për vendimet për ngrirjen e çmimeve.
Qeveria në fund të shkurtit e ngriu çmimin e bukës së bardhë dhe gjysmë të bardhë nga 450 gramë në 33 denarë pasi analizat e Ministrisë së Ekonomisë dhe kontrollet inspektuese treguan se disa kompani nuk i ulën çmimet në përputhje me rrethanat edhe pse përdorën rrymë të subvencionuar.
Kryeministri Dimitar Kovaçevski më pas në një konferencë për media tha se nuk do të lejojë rritje të paarsyeshme të çmimeve.(INA)
