Ministri i Punëve të Brendshme, Oliver Spasovski, në një deklaratë për media dhe lidhur me zjarrin që shpërtheu në Gjykatën e Kumanovës, tha se nuk dihet saktësisht se çfarë e ka shkaktuar zjarrin, por se janë aktivizuar të gjitha shërbimet në terren në mënyrë që të mund të kryejë një kontroll dhe të përcaktojë shkakun e zjarrit, përcjell INA.
Sipas informacioneve fillestare, nga zjarri është djegur një pjesë e arkivit me sende të vjetra në Gjykatën e Kumanovës.
“Për momentin nuk mund të themi saktësisht se çfarë është përfshirë nga zjarri pasi sipas informacioneve të fundit, procesi i fikjes ende po vijon. Ne kemi aktivizuar të gjitha shërbimet. Nga Shkupi kanë shkuar në Kumanovë edhe shefat e departamentit për hetime kriminalistike dhe teknike dhe ekspertizë që të bëhet një kontroll dhe të shohim se cilat janë shkaqet dhe çfarë konkretisht është prekur nga zjarri”, tha ministri Oliver Spasovski.
Zjarri ka rënë pas mesnate, ndërsa tymi është ende i pranishëm në ambientet e gjykatës në Kumanovë.(INA)
