“Mania” e Messit në Shtetet e Bashkuara të Amerikës është në kulminacion, pasi një nga futbollistët më të mëdhenj të të gjitha kohërave fluturoi përtej oqeanit dhe nënshkroi për Inter Miami.
Ai shënoi disa gola, Amerika pa live se çfarë do të thotë Lionel Messi. Por një protagonist i kësaj është edhe Amet Korcha, që luan për Dallasin dhe që u përballë me Messin në të njejtën fushë.
Mbrojtësi i skuadrës së Dallasit, i cili pati mundësinë të shohë nga afër magjinë e superlojtarit botëror të sapoardhur tek Inter Miami.
Po kush është në të vërtetë Amet Korça?
Ai është 22 vjeçari me origjinë nga Struga që aktualisht luan për ekipin e Dallasit. Një shqiptaro-amerikan që rrugëtimin e tij të futbollit e kishte nga Kroacia duke e çuar në SHBA. Ai fillimisht ishte pjesë e ekipit të të rinjve të Dinamo Zagrebit dhe më pas kaloi në Ligën e dytë të Dubravës pas një përvoje seniore. Së fundi, ai luajti edhe për ekipin e Goricës përpara se të kthehej në Shtetet e Bashkuara dhe të nënshkruante për ekipin e Dallas MLS.
Bëhet fjalë për një stoper tejet të gjatë, 191 centimetra, që luan me këmbën e djathtë dhe që ende nuk ka luajtur zyrtarisht për asnjë kombëtare. Për kombëtaren shqiptare ka paraqitje në kategoritë e të rinjve, por ato ishin ndeshje jozyrtare.(INA)
