“Qytetarët e Maqedonisë e perceptojnë korrupsionin si një nga problemet kryesore në vend dhe Qeveria duhet të tregojë se po merret me këtë problem”, tha në një intervistë për MIA, përfaqësuesi special i Mbretërisë së Bashkuar për Ballkanin Perëndimor, Lordi Stuart Peach.
Sipas tij, sondazhet këtu tregojnë se opinioni, qytetarët e Maqedonisë, korrupsionin e perceptojnë si problem.
“Qeveria duhet të tregojë se po merret me këtë problem. Të kesh një sistem emërimesh të pavarur të bazuar në merita, për shembull një proces transparent përzgjedhjeje për postet kyçe, duke përfshirë gjyqtarët, anëtarët e Komisionit Kundër Diskriminimit dhe pozitat e larta drejtuese, është një fillim i mirë, së bashku me nevojën për transparencë dhe llogaridhënie”, theksoi Peach, i cili vizitoi vendin këtë javë dhe zhvilloi takime me përfaqësues të lartë të shtetit dhe shoqërinë civile.(INA)
