Sot në të gjitha viset tona po mbanë mot mjaft i nxehtë dhe me kalime vranësirash, ndërsa tani kemi zhvillime të izoluara të vranësirave konvektive.
Gjatë pasdites priten zhvillime më të përhapura konvektive që nga Shqipëria deri në Luginë të Preshevës dhe që nga Mali i Zi e deri në Maqedoninë Veriore, vende-vende priten rrebeshe shiu me vetëtima, bubullimë dhe mundësi për breshër.
Temperaturat shumë të larta dhe ardhja e masës ajrore mjaft jo-stabile nga Mesdheu të hënën mund të shkaktojë procese të bujshme atmosferike, me zhvillime të shtrëngatave lokale të shiut me vetëtima dhe bubullimë që nga viset bregdetare e pastaj në gati të gjitha territoret tona. Shtrëngata shiu priten shpesh-herë në bregdet gjatë ditës së hënë, eventualisht edhe të martën, por jo pa ndërprerje. Shtrëngata shiu priten si në pjesën veriore, po ashtu edhe në jug të Shqipërisë.
Destabilizim i fuqishëm i atmosferës përpos sonte pritet sidomos të hënën pasdite edhe në Kosovë dhe Maqedoninë Veriore me zhvillime masive konvektive. Në shumë vende priten rrebeshe intensive që sadopak mund të zbusin gjendjen shumë të rëndë ma thatësinë e madhe.
Rrebeshe dhe zhvillime intensive parashihen edhe të Martën, ndërkohë që në bregdet moti do të fillojë të përmirësohet edhe pse jo krejtësisht.
Temperaturat në të gjitha viset do të shënojnë ulje dhe kjo do të jetë një lehtësim i madh për të gjithë ne pas një periudhe mjaft të gjatë me vapë të madhe verore, por ndërkohë që gjatë kësaj periudhe mund të kemi stuhi të fuqishme lokale.
Nga mesi i javës së re presim përmirësim të motit, stabilizim të atmosferës dhe rritje të serishme të temperaturave./MeteoBallkan
