Forcat ruse kanë goditur sërish kryeqytetin ukrainas, Kievin, duke shkaktuar një seri shpërthimesh të fuqishme gjatë natës dhe në orët e para të mëngjesit. Sulmet kanë lënë pas të plagosur, ndërtesa të përfshira nga flakët dhe dëmtime të mëdha në infrastrukturë.
Shefi i Administratës Ushtarake të Kievit, Timur Tkachenko, shkroi në Telegram:
“Forcat ruse po godasin ndërtesat banesore. Ka shumë objekte të dëmtuara, pothuajse në çdo distrikt të Kievit.”
Kryetari i qytetit, Vitali Kliçko, njoftoi se mbetjet e goditjeve janë shpërndarë në disa zona të kryeqytetit, duke shkaktuar zjarre të shumta. Sipas tij, të paktën 11 persona janë plagosur, ndërsa ekipet e emergjencës po punojnë në terren për shuarjen e flakëve dhe ofrimin e ndihmës. Pesë prej të lënduarve janë dërguar në spital, mes tyre një burrë dhe një grua shtatzënë në gjendje kritike.
Raportimet e Reuters dhe Associated Press bëjnë të ditur se mbi qytet janë dëgjuar shpërthime të fuqishme, ndërsa mbrojtja ajrore është aktivizuar për t’i zmbrapsur sulmet. Autoritetet u kanë bërë thirrje qytetarëve të qëndrojnë në strehimore deri në përfundimin e alarmit, ndërsa kanë paralajmëruar për mundësi ndërprerjesh të energjisë elektrike dhe furnizimit me ujë.
Pamjet e publikuara në rrjetet sociale tregojnë ndërtesa në flakë dhe qytetarë të mbledhur në rrugë, ku duken rrënoja para hyrjeve të banesave, raporton “The Guardian”.
Autoritetet njoftuan se dronë dhe raketa mbrojtëse janë dislokuar në disa zona të qytetit, ndërsa ekipet e shpëtimit po punojnë në pikat më të prekura.
Kryebashkiaku Kliçko shtoi se edhe sistemi i ngrohjes ka pësuar dëme, duke shkaktuar ndërprerje të shërbimit në një nga distriktet e Kievit. Ai paralajmëroi se ndërprerjet e energjisë dhe ujit mund të shfaqen edhe në pjesë të tjera të qytetit.
Në distriktin Dërnjicki, mbetjet e raketave kanë rënë në oborrin e një ndërtese banimi dhe në hapësirat e një institucioni arsimor, ndërsa një automjet ka marrë flakë nga fragmentet e rënë. Në distriktin Dnjeprovski, fragmente të tjera kanë dëmtuar tre ndërtesa banimi, një shtëpi private dhe kanë shkaktuar një zjarr në ambient të hapur. Ndërsa në distriktin Podilski, dëmtime janë raportuar në pesë ndërtesa banimi dhe një objekt tjetër jorezidencial.
Sulme të ngjashme me fragmente raketash dhe dronësh janë regjistruar edhe në zona të tjera të kryeqytetit.
Në rajonin më të gjerë të Kievit, sipas autoriteteve, është dëmtuar infrastrukturë kritike dhe disa shtëpi private, ndërsa të paktën një civil është plagosur. Kreu i rajonit, Mikola Kalashnik, njoftoi se një 55-vjeçar nga Bila Cerkva është shtruar në spital me djegie të marra nga zjarret e shkaktuara pas sulmeve në zonat periferike.
Sulmi masiv rus vjen pak ditë pasi përfaqësues të Bashkimit Evropian kërkuan nga Ukraina të vazhdojë luftën kundër korrupsionit, pas një skandali të madh që solli dorëheqje dhe shkarkime të disa zyrtarëve të lartë të sektorit energjetik. Ndërkohë, udhëheqësit evropianë kanë rikonfirmuar mbështetjen e tyre të plotë për Ukrainën në përballje me agresionin rus.(INA)
