Rusia po i përdor pamjet për të sulmuar “Perëndimin” si organizatorin e luftës: të paktën tre automjete luftarake të blinduara gjermane “Mardr” u përdorën në ofensivën e befasishme të Ukrainës në zonën kufitare ruse pranë Kurskut.
Armët e prodhimit gjerman në territorin rus? Ngjashëm me Kremlinin, deputetja gjermane Sahra Wagenknecht thotë se është kaluar vija e kuqe.
Megjithatë, qeveria federale dhe partia më e madhe opozitare, CDU, nuk duket se kanë ndonjë problem me sulmin e Ukrainës.
Ministri i Mbrojtjes, Boris Pistorius, mban një profil të ulët dhe nuk kritikon. Një zëdhënës i Ministrisë së Mbrojtjes iu përgjigj në mënyrë evazive pyetjes së BILD: “Qëllimi i deklaruar i qeverisë federale është të mbështesë Ukrainën në luftën e saj mbrojtëse kundër agresorit rus”.
Ai i referohet deklaratave të kancelarit Olaf Scholz në maj në Meseberg. Këtu, për herë të parë, Scholz nuk kishte më asnjë kundërshtim për përdorimin e armëve gjermane kundër zonës kufitare ruse pranë qytetit të Kharkiv. Gjermania dhe SHBA-të kishin ndaluar më herët çdo sulm kundër territorit rus, duke dobësuar rëndë mbrojtjen e Ukrainës.
A e dinte qeveria federale?
Eksperti ushtarak, Carlo Masala, beson se ukrainasit i përdorën transportuesit e blinduar pa u konsultuar me Gjermaninë. Ai thotë për BILD: “Nga këndvështrimi ukrainas, ju mund të argumentoni se kjo ishte marrëveshja me partnerët e NATO-s”.
“Putini po turfullon”
Marrëveshja e negociuar me partnerët e NATO-s korrespondon me atë që Scholz njoftoi në maj. Që atëherë, armët perëndimore janë lejuar të qëllojnë mbi pozicionet dhe objektet ushtarake ruse – por vetëm në zonën kufitare pranë Kharkivit. Aty mund të përfshihet edhe Kursk, thotë Masala.
SHBA tani po kërkon shpjegime nga Ukraina, thotë eksperti ushtarak. Ai pret që rezultatet të ndahen me aleatët gjermanë. Eksperti: “Nuk besoj se Gjermania do të bëjë një ankesë direkt te Ukraina”.
Po presidenti rus Vladimir Putin? “Ai po turfullon,” thotë Masala. Megjithatë, ai nuk pret një përshkallëzim për shkak të përdorimit të armëve gjermane në territorin rus. “Putini do ta shohë këtë si një fyerje, por nuk do të ndërmarrë veprime.”
“Me transferimin e armëve gjermane në Ukrainë, ato janë armë ukrainase”
Kryetari i Komisionit të Mbrojtjes, Marcus Faber, e përshkroi sulmin e Ukrainës si “plotësisht legjitim”. “Me dorëzimin e armëve gjermane në Ukrainë, ato janë armë ukrainase, kjo vlen për të gjithë arsenalin – përfshirë “Leopard 2” dhe “Marder”.
Roderich Kiesewetter i CDU thotë gjithashtu për BILD se “Marders” janë de fakto transportues të blinduar ukrainas pasi u dorëzuan nga Gjermania.
Territori i agresorit është një zonë lufte dhe ndërhyrja në objektet ushtarake është legjitime sipas ligjit ndërkombëtar, sipas politikanit të Unionit, i cili është anëtar i Komitetit të Punëve të Jashtme. (BILD)
