Ministria e Punëve të Brendshme (MPB) është ende në kërkim të sulmuesit që dje qëlloi me armë dy persona në qendrën tregtare “East Gate” në Shkup, duke u larguar më pas në drejtim të panjohur, përcjell INA.
Në rrjetet sociale dhe portale maqedonase janë shfaqur foto të reja ku shihet sulmuesi i ulur në një pikë bastesh në qendrën tregtare dhe nuk fshihet fare.
Ai dje rreth orës 15:00 qëlloi me armë dy persona mes të cilëve një kriminel i shumëkërkuar Rade Trajkovski- Shtekli, që kanë përfunduar me plagë të rënda në Spitalet e Shkupit. Ata tanimë janë në gjendje stabile, por për shkak të rëndesës së plagëve të marra mbeten në reanimacionet e spitaleve ku janë shtruar.
Sulmin e djeshëm ministri i Punëve të Brendshme, Oliver Spasovski e vlerësoi si rast të izoluar dhe shtoi se “incidente të tilla të izoluara kanë ndodhur dhe do të ndodhin”.
Ministri Spasovski theksoi se në Sektorin e Punëve të Brendshme (SVR) Shkup është formuar një shtab i posaçëm, i cili së bashku me departamentet për krim të organizuar, policinë kriminale dhe forenzikë janë duke punuar në mbledhjen e informatave dhe provave me qëllim të vërtetimit të fakteve dhe motivet e sulmit të djeshëm në “East Gate”.(INA)
