Realizoi një kryevepër, zhbllokoi ndeshjen ndaj Polonisë dhe “inauguroi” fitoren tejet vendimtare ndaj Polonisë. 2-0 i arritur mbrëmë në “Arena Kombëtare” i rrit ndjeshëm shanset e kuqezinjve për të shkuar në finalet e “Euro 2024”.
Me 10 pikë të grumbulluara deri tani, me tri ndeshje të mbetura nga kjo fushatë kualifikueses, Sylvinho dhe të tijtë kryesojnë grupin E për momentin. Njeriu i atij super goli, që pas ndeshjes u publikua edhe në faqen e “UEFA Euro 2024” në rrjetet sociale, Jasir Asani, u shpreh kështu për mikrofonin e SuperSport:
“Të them të drejtën, fusha nuk ka qenë siç duhet, nuk na lejoi të luajmë futbollin që kemi bërë gjithë javën. Por, erdhi goli dhe u çliruam, kemi kualitete të larta. Mendova për krosim, por pashë Szczesny të lëvizte dhe mbylla sytë, godita. E dija se po të shkonte në portë do të ishte gol. Szczesny më tha bravo se ishte një supergjuajtje dhe se nuk e priste të gjuaja nga ajo distancë.
E dimë për çfarë kemi ardhur në kombëtare, stafi ka bërë shumë punë. Meritat për mua i merr trajneri Sylvinho, pa të nuk do të isha në kombëtare. Ai më ka dhënë shumë besim, së bashku me Zabaleta.
Cili është goli më i bukur, i Asllanit, Bajramit apo ky i imi në këto eliminatore? Të gjithë janë të bukur. Edhe i Bajramit ishte i bukur, sepse na dha një pikë”.
