Ministrat e Mbrojtjes të vendeve anëtare të NATO-s takohen sot dhe nesër në Bruksel. Sekretari i Përgjithshëm i NATO-s, Jens Stoltenberg deklaroi dje në Bruksel se pret që në këtë takim të diskutohet çështja e furnizimit të Ukrainës me avionë luftarakë.
Stoltenberg theksoi gjithashtu se vendet e NATO-s që do të furnizojnë Ukrainën me avionë luftarakë nuk do ta bëjnë NATO-n pjesë të konfliktit.
Rusia, sipas Ukrainës, po planifikon një ofensivë të re të madhe dhe kështu Kievi po kërkon avionë luftarakë dhe raketa me rreze të gjatë veprimi për të kundërshtuar ofensivën dhe për të rimarrë territorin e humbur.
Aleanca pritet gjithashtu t’u kërkojë anëtarëve të saj të rrisin rezervat e municioneve, të cilat janë varfëruar rëndë nga lufta në Ukrainë, pasi aleatët përpiqen të armatosin Kievin dhe të forcojnë ushtritë e tyre një vit pasi filloi pushtimi rus i Ukrainës.
Edhe para pushtimit të Ukrainës nga Rusia, shumë vende të NATO-s nuk arritën të përmbushnin objektivat e rezervave të aleancës, pasi zyrtarët i konsideronin luftërat që përfshinin beteja artilerie në shkallë të gjerë një gjë të së kaluarës.
Megjithatë, ritmi i dërgesave në Ukrainë, ku trupat ukrainase qëllojnë deri në 10,000 predha artilerie në ditë, ka varfëruar furnizimet perëndimore dhe ka ekspozuar mangësitë në efikasitetin dhe shpejtësinë e zinxhirëve të furnizimit.
“Nëse Evropa lufton kundër Rusisë, disa vendeve do t’i mbarojnë municionet brenda pak ditësh”, tha një diplomat evropian. NATO sapo ka përfunduar një studim urgjent të rezervave të mbetura të municioneve, tha një zyrtar i NATO-s, duke folur në kushte anonimiteti. (INA)