Kryetari i Lëvizjes BESA, Bilall Kasami dhe kryetari i Alternativës, Afrim Gashi kanë zhvilluar një takim kokë më kokë pas më shumë se katër viteve, raporton Televizioni 24.
Sipas informacioneve të televizionit, liderët e dy partive opozitare janë takuar javën e kaluar, me qëllim që, siç thonë burime nga të dyja palët, të tentojnë të shkrinin akullin për një bashkëpunim më serioz në të ardhmen.
Sipas të njëjtave informacione, në takim nuk është folur për bashkëpunim thelbësor, por vetëm një takim fillestar, pasi disa herë të dyja palët kanë paralajmëruar mundësinë e bashkëpunimit në të ardhmen për, siç thonë ata, lënien e BDI-së në opozitë. TV 24 u bëri pyetje të dyja palëve, BESA as e konfirmon dhe as e mohon takimin.
Nga Alternativa e Afrim Gashit kanë theksuar se sigurisht që ka kontakte mes Alternativës dhe Besës, por duhet të priten nëse do të ketë bashkëpunim dhe si do të duket. (INA)
