Kryetari i OEMVP-së, Mendi Qyra, së bashku me kryesinë dhe anëtarët e Këshillit Drejtues, priti në takim Kryetarin e Aleancës Kosovare të Bizneseve, Agim Shahini, dhe përfaqësuesit e bordit drejtues.
Takimi u fokusua në mundësitë për fuqizimin e bashkëpunimit ekonomik mes Maqedonisë së Veriut dhe Kosovës, me theks të veçantë në përmirësimin e klimës afariste dhe lehtësimin e zhvillimit të bizneseve.
Në qendër të bisedimeve qëndruan çështjet e eliminimit të barrierave doganore dhe harmonizimit të tarifave, si hapa të rëndësishëm për të përshpejtuar shkëmbimet tregtare dhe për të optimizuar logjistikën e mallrave. Po ashtu u diskutua sfida e mungesës së fuqisë punëtore të kualifikuar, për të cilën u theksua nevoja për politika të përbashkëta që mbështesin arsimin profesional dhe përfshirjen aktive të të rinjve në tregun e punës.
Ky takim vjen si një hap i rëndësishëm drejt thellimit të bashkëpunimit ekonomik dhe zhvillimit të qëndrueshëm ndërmjet dy vendeve.(INA)
