Komisioneri për fqinjësi dhe zgjerim i Bashkimit Evropian Oliver Varhej sot në Bruksel do të takoj përfaqësuesit e bullgarëve në Maqedoninë e Veriut, njoftoi BGNES.
Bullgarët maqedonas theksuan se kërkuan që takimi të mbahet për shkak të urrejtjes institucionale dhe diskriminimit sistematik ndaj tyre në Republikën e Maqedonisë së Veriut. Biseda me Varhein ka ndodhur pas rrahjes së sekretarit të një klubi bullgar në Ohër, Hristijan Pendikov, i cili aktualisht po trajtohet në Akademinë e Shkencave Mjekësore në Sofje.
Përfaqësuesi i lartë i BE-së për politikë të jashtme, Josep Borell, dje ka dënuar kategorikisht sulmin ndaj Hristijan Pendikov. Kjo ka ndodhur gjatë takimit të tij me ministrin e Punëve të Jashtme të Republikës së Maqedonisë, Bujar Osmani. Ky i fundit premtoi se “përgjegjësit për incidentin do të sillen para drejtësisë”.
Liderët e bullgarëve maqedonas vazhdimisht kanë theksuar se në vendlindjen e tyre nuk ka dëshirë për dialog me ta nga ana e pushtetit lokal dhe qendror. Ata u bëjnë thirrje institucioneve evropiane që të ndihmojnë në zvogëlimin e presionit të përditshëm ndaj qytetarëve të RMV-së, të cilët nuk kanë frikë, përkundër rrezikut të diskriminimit dhe gjuhës së urrejtjes, të mbrojnë hapur trashëgiminë dhe identitetin e tyre bullgar maqedonas.
Bullgarët e Maqedonisë do të përfaqësohen nga Petar Kolev, Georgi Trendafilov dhe Ljupço Georgievski. (INA)
