Në hapësirat e Qeverisë ka përfunduar takimi midis kryeministrit Hristijan Mickoski dhe kreut të LSDM, Venko Filipçe.
Sipas Filipçes, takimi me kryeministrin Mickoski ka qenë i mirë dhe konstruktiv. Ai shtoi se janë pajtuar me Mickoskin për formimin e grupeve punuese.
“Ne ramë dakord që të punojmë në atë mënyrë, të formojmë organe dhe grupe punuese për zbatimin e agjendës së reformave. Pra, ligjet fillestare në fushën e drejtësisë, pastaj energjetike dhe disa gjëra për lëvizjet strategjike në shëndetësi. Ky është një takim fillestar, të shohim se cila do të jetë metodologjia”, tha Filipçe.
Ai shpjegoi se nuk kanë caktuar një takim të radhës, por se do të delegojë ekspertë nga energjia dhe drejtësia.
“Ne kemi biseduar për integrimet evropiane, kemi qëndrime të ndryshme, do të diskutojmë më tej”, theksoi Filipçe.
Kryetari i LSDM-së thotë se hapi i radhës logjik është takimi i liderëve.
Mickoski shkurt në rrjetet sociale ka shkruar se po diskutohet për zhvillimet aktuale dhe se Maqedonisë i duhen më shumë përgjegjësi, mençuri dhe ndershmëri.
Pas zjarrit në Koçan në diskotekën Pulse ku më 16 mars humbën jetën 59 persona, kreu i LSDM-së, Filipçe bëri thirrje për takim liderësh, por që përfundoi në takim dypalësh.(INA)
