Aleanca për Shqiptarët mbajti sot Kuvendin e saj partiak në qytetin e Strugës, duke vendosur një standard të ri në llogaridhënie dhe transparencë brendapartiake. Gjatë këtij Kuvendi, të gjithë funksionarët, pa përjashtim, raportuan për punën e tyre përpara kuvendarëve.
Kjo praktikë inovative e llogaridhënies, e ndërmarrë nga ASH, përfshin kryetarin e partisë, ministra, zëvendësministra, deputetë, drejtorë dhe funksionarë të tjerë. Për më tepër, kjo qasje e re do të shtrihet edhe në nivel lokal, duke e bërë të detyrueshme llogaridhënien në të gjitha degët ku ASH operon.
Në këtë Kuvend, Arianit Reka u zgjodh kryetar i Akademisë pranë ASH-së, një organ i pavarur partiak me një mision të qartë.
Akademia synon të promovojë dialogun e strukturuar dhe përfshirës, duke nxitur kulturën e mirëkuptimit, kompromisit dhe respektit të ndërsjellë midis pjesëtarëve me ide të ndryshme politike brenda partisë. ASH vazhdon të demonstrojë përkushtim ndaj qeverisjes së mirë dhe përfshirjes së bazuar në transparencë dhe llogaridhënie, duke sjellë një model të ri për partitë politike në vend.
