Kryetari i Aleancës për Shqiptarët, Arben Taravari, ka mbajtur sot në mbrëmje një tubim nga qyteti i tij i Gostivarit, ku gjatë ditës së sotme ka pasur edhe kërcënime me jetë ndaj tij, tha se nuk e kupton pse disa funksionarë të Aleancës për Shqiptarët duan ta mbajnë BDI-në me çdo kusht në pushtet.
“Si kryetar partie që jam, kam të drejtën të shpreh mendimin tim, ta them atë që është më mirë për shqiptarët, për ta kthyer kredibilitetin e partisë. Por gjeta një nervozizëm te disa anëtarë të partisë, që janë edhe funksionarë, nuk e di pse janë ofruar me BDI-në dhe duan me çdo kusht ta mbajnë BDI-në në pushtet”, tha Taravari.
Ai shtoi se tani më shumë se kurrë ai është i bindur për rrugën që kanë zgjedhur, atë të bashkimit me opozitën shqiptare. Sipas tij, këtë ai e ka konstatuar në takim me të gjitha degët e partisë, duke folur në mbledhjen e Kryesisë së ASH-së para një muaji, por mbi të gjitha edhe me qytetarët që duan ndryshimin.
“Unë e dija se zëri i popullit është për bashkëpunim me opozitën, duke folur me kryetarët e degëve, duke folur në mbledhjen e Kryesisë para një muaji, por tash kur e shoh përkrahjen e popullatës, jam i sigurtë se ne duhet ta vazhdojmë këtë rrugë dhe sa më shpejtë ta sjellim ndryshimin te shqiptarët. E di se tani do të ketë mënyra që të më deskrititojnë si njeri, por gëzohem se popullin e kam me vete. Më së shumti që iu duhet tani shqiptarëve, është të sjelim ndryshime te ata dhe besoj se më 8 maj do të festojmë së bashku. 70 për qind të kuvendarëve janë përgjigjur pozitivisht kërkesës time për bashkëpunim me opozitën”, deklaroi Taravari.
