Ministri i Shëndetësisë, njëherë kreu i Aleancës për Shqiptarët, Arben Taravari, i cili merr pjesë në Asamblenë e Përgjithshme të 79-të të KB-së, deklaroi se marrëdhëniet ndërmjet partnerëve në koalicionin e udhëhequr nga VMRO-DPMNE, ku janë VLEN dhe ZNAM, janë korrekte dhe se kjo Qeveri do të vazhdojë të funksionojë. Qeveria, thotë ai, ka strategji më afatgjate, por nevojitet konsultim më i shpeshtë dhe sinkronizim ndërmjet partive politike në pushtet.
Siç raporton MIA nga Nju-Jorku, Taravari këtë e tha pas deklaratave të Halil Snopçes në Click Plus në TV21, i cili tha se VLEN do të largohet nga koalicioni qeveritar nëse votohet ligji për “branitellat”, deklarata për të cilat kryeministri Hristijan Mickoski, i uroi fat deputetit nëse kjo do të ndodhte.
Në lidhje me: Branitellat, Snopçe paralajmëron braktisje të Qeverisë – Mickoski: I qoftë me fat/ Petrovska kërkon përgjegjësi nga Gashi
“Mund të them se raportet mes Vlenit dhe VMRO-DPMNE-së janë mjaft korrekte. Në nivelin e kryetarëve të partive. Normalisht kemi struktura për të gjitha partitë VLEN dhe VMRO-DPMNE. Ndoshta ka pasur ndonjë keqkuptim të vogël diku që nuk mund të them të njëjtën gjë për ZNAM dhe VLEN. Megjithatë, përsëri do të them se marrëdhëniet mes partnerëve në koalicionin e udhëhequr nga VMRO-DPMNE, ku janë VLEN dhe ZNAM janë korrekte dhe jemi munduar të jemi sa më sinkron këto njëqind ditë, por diku ka pasur keqkuptime, diku ka pasur ndërhyrje që nuk ishin të koordinuara si duhet, prandaj duhet kohë që të sinkronizohen plotësisht dhe kompletisht dhe kjo të shihet edhe te qytetarët. Megjithatë, në përgjithësi mund të them se pritshmëritë e qytetarëve nga kjo shumicë ishin të mëdha”, tha ministri i Shëndetësisë.
