Tenderi për ndërtimin e garazheve në kate ende nuk është nënshkruar, thotë ministri i Shëndetësisë, Arben Taravari. Sipas tij kanë mbetur edhe disa filtra të cilat duhet të kalojnë në Qeveri. Taravari tha se nuk e ka analizuar profilin e kompanisë së vetme të paraqitur për ndërtimin e garazheve në kate, por e rëndësishme ishte nëse i plotëson kushtet e duhura. Sipas vlerësimeve të Ministrisë së Shëndetësisë, investimi do t’i kushtohet koncesionerit mbi dhjetë milionë euro. Kompania Gjoka Construction nga Shqipëria nëpërmjet partneritetit publiko privat pritet të menaxhojë me parkingun e Qendrës Klinike Nënë Tereza.
“Procedura ka kaluar, megjithatë përsëri duhet të kalojë disa filtra të caktuara të cilat kalojnë në qeveri. Megjithatë kjo nuk është për 20 vite, sipas fizibilitetit është e paraparë të jetë për 20 vite, por në ndërkohë ka vendim të qeverisë se parkingu mund të përdoret përderisa qendra klinike është këtu. Unë personalisht mendoj se qendra klinike këtu nuk do të jetë më shumë se 7-8 vite”, tha Arben Taravari, ministër i shëndetësisë. /Alsat.mk
