Policia e Kosovës ka njoftuar se më 20 dhe 21 qershor 2025 do të ketë bllokim të përkohshëm të qarkullimit për automjete në disa segmente të autostradave dhe rrugëve nacionale, për shkak të garave çiklistike të organizuara nga Federata e Çiklizmit të Kosovës.
Garat janë pjesë e Kampionatit të Kosovës në Çiklizëm dhe do të zhvillohen sipas këtij orari:
🔸 E premte, 20 qershor 2025
⏰ Ora 10:00 – 14:00
📍 Segmenti i autostradës “Arbër Xhaferi” nga hyrja/dalja Lipjan deri te hyrja/dalja Bibaj, në drejtimin Prishtinë – Hani i Elezit.
🔸 E shtunë, 21 qershor 2025
⏰ Ora 09:00 – 16:00
📍 Itinerari i garës:
Autostrada “Arbër Xhaferi” – Bibaj – Babush – Lipjan – Prishtinë (Uglar) – Bresje – Rruga N9 deri në Gjergjicë – Autostrada “Ibrahim Rugova” – Malishevë – Duhel, dhe anasjelltas.
Policia e Kosovës do të zbatojë masat e nevojshme për mbarëvajtjen e garave dhe sigurinë e të gjithë pjesëmarrësve në trafik. Autoritetet u bëjnë thirrje qytetarëve që të tregojnë mirëkuptim dhe, nëse është e mundur, të përdorin rrugë alternative për të shmangur pritjet dhe bllokimet.
