Kryetari i Kuvendit Talat Xhaferi do ta thërrasë seancën për zgjedhjen e përbërjes së re të qeverisë të shtunën në ora 11:00.
Këtë Xhaferi ia ka deklaruar mandatarit Dimitar Kovaçevskit në mbledhjen e sotme kur në Kuvend i ka dorëzuar propozimet për përbërjen e qeverisë së re dhe programin e punës.
Kryeministri i mandatuar për përbërjen e Qeverisë së re të Republikës së Maqedonisë së Veriut, Dimitar Kovaçevski sot zyrtarisht ia dorëzoi kryetarit të Kuvendit, Talat Xhaferi, draft përbërjen dhe Projektprogramin për punën e qeverisë së re.
Ai në mbledhje ka treguar se pret që zgjedhja e anëtarëve të qeverisë dhe programi i saj të miratohet pa vonesë, tha shërbimi për shtyp parlamentar.
Në këtë takim, kryeparlamentari Xhaferi e njoftoi Kovaçevskin se të shtunën do të mbledhë seancë për zgjedhjen e qeverisë së re.(INA)