Një rast i rëndë ka ndodhur gjatë orëve të para të ditës së sotme në Saraj të Shkupit, ku një 26-vjeçar nga Saraji është sulmuar nga tre persona, të cilët kanë përdorur edhe mjet të mprehtë, transmeton TV21.
Pas lëndimeve të marra, 26-vjeçari është dërguar në Kompleksin e Klinikave “Nënë Tereza”, nga ku është denoncuar edhe rasti i dhunës.
“Sot (08.08.2023) rreth orës 02.20 në SPB Shkup, nga Kompleksi i Klinikave “Nënë Tereza” është denoncuar se tek ata, me lëndime të rënda trupore është dërguar B.A.(26) nga fshati Saraj i Shkupit. Sipas së denoncuarës, rreth orës 01:50 në fshatin Saraj, A.A. nga Kondova e Shkupit dhe dy persona të tjerë, pas një kacafytjeje, e kanë sulmuar fizikisht dhe me mjet të mprehtë i kanë shkaktuar lëndime. Hetim në vendin e ngjarjes ka kryer ekipi i SPB Shkup dhe ndërmerren masat për zbardhjen e rastit”, qëndron në buletinin e Ministrisë së Punëve të Brendshme.
