Në prag të zgjedhjeve lokale që do të mbahen në vjeshtë, për komunën e Kërçovës po përflitet se mund të garojnë tre kandidatë shqiptarë. Koalicioni VLEN ka konfirmuar se do të ketë një kandidat për këtë komunë, megjithëse ende nuk ka bërë publik emrin e tij. Kryetari i Lëvizjes Besa dhe njëherazi përfaqësues i VLEN-it, Bilall Kasami, tha se emri i kandidatit do të dalë pas konsultimeve të gjera me qytetarët, strukturat e partive, shoqërinë civile dhe me faktorë të tjerë, ndërsa mund të përdoren edhe sondazhe për të përcaktuar kandidatin më të pranueshëm.
Një tjetër kandidat i cili tashmë ka shpallur publikisht garimin e tij është Shkodran Alili, që do të marrë pjesë si i pavarur. Ai ka bërë thirrje që kësaj here partitë të hapin rrugë për rininë, duke theksuar se është koha për një rotacion politik që i jep hapësirë të rinjve të dëshmojnë kapacitetet e tyre për të ndërtuar të ardhmen.
Ndërkohë, BDI, që e konsideron Kërçovën si bastion, ka gjasa të dalë sërish me kandidatin e saj. Kryetari aktual i komunës, Fatmir Dehari, shpreh gatishmërinë për të kërkuar një mandat të katërt, por vendimi përfundimtar do të varet nga vendimi i partisë dhe rezultatet e sondazheve të opinionit publik që do të tregojnë mbështetjen e qytetarëve.
Nga blloku maqedonas, ende nuk ka pasur qëndrime zyrtare për kandidaturat për komunën e Kërçovës. Pritet që VMRO-DPMNE-ja dhe LSDM-ja të dalin me emrat e tyre në javët në vijim. Zgjedhjet lokale do të mbahen në tetor dhe po pritet me interes të madh gara për këtë komunë të rëndësishme të Maqedonisë së Veriut.(INA)
