Presidenti amerikan Donald Trump ka shpallur ndalimin e hyrjes në Shtetet e Bashkuara për shtetasit e 12 vendeve, me arsyetimin se masa synon të mbrojë vendin nga kërcënimet e mundshme terroriste. Vendimi është bërë publik të mërkurën nga Shtëpia e Bardhë, përmes një deklarate zyrtare, dhe pritet të hyjë në fuqi të hënën, më 9 qershor.
Vendimi prek shtetasit nga këto vende: Afganistani, Mianmari, Çadi, Republika Demokratike e Kongos, Guinea Ekuatoriale, Eritrea, Haiti, Irani, Libia, Somalia, Sudani dhe Jemeni.
Përveç ndalimit të hyrjes për këto vende, administrata amerikane do të vendosë gjithashtu kufizime të rrepta për shtetasit nga shtatë vende të tjera: Burundi, Kuba, Laosi, Sierra Leone, Togo, Turkmenistani dhe Venezuela.
Sipas presidentit Trump, kjo masë është një përgjigje e drejtpërdrejtë ndaj një sulmi të ndodhur të dielën në Kolorado, ku një person, i cili dyshohet se ndodhej në SHBA në mënyrë të paligjshme, hodhi mjete zjarrvënëse ndaj pjesëmarrësve të një marshimi pro-izraelit.
Shtëpia e Bardhë e ka cilësuar sulmin si një sinjal alarmi për nevojën e rritjes së kontrolleve të emigracionit dhe masave të sigurisë kombëtare.
