Presidenti amerikan, Donald Trump ka pasur një takim të tensionuar me homologun ukrainas, Volodymyr Zelensky në Shtëpinë e Bardhë teksa bisedonin për luftës mes Rusisë dhe Ukrainës.
Pas përplasjes, Trump foli më vonë me gazetarët teksa u nis për fundjavë në shtëpinë e tij në Florida, shkruan skynews.
“Ajo që ai duhet të thotë është: ‘Unë dua të bëj paqe.’ Nuk ka pse të qëndrojë aty dhe të thotë ‘Putin kështu, Putin ashtu,’ vetëm gjëra negative. Ai duhet të thotë: ‘Unë dua të bëj paqe. Nuk dua të merrem më me një luftë’,” tha 78-vjeçari.
Ndërkohë në një intervistë me mediumin amerikan Fox News, lideri ukrainas e përshkroi takimin si një moment me qëndrime të hapura dhe të ndryshme mes dy udhëheqësve të vendeve, por tha se nuk e shihte të nevojshme të kërkonte falje.
Ai shtoi se dëshironte që Trump të ishte “më shumë në anën tonë” pasi presidenti amerikan kishte thënë se ishte mes Ukrainës dhe Rusisë.
“Unë dua, vërtet, që ai të jetë më shumë në anën tonë. Nuk është thjesht se lufta filloi diku mes vendeve tona. Lufta filloi kur Rusia e solli këtë luftë në vendin tonë. Dhe ata nuk kanë të drejtë”.
Ndryshe, Trump refuzoi të thotë se Rusia e filloi luftën dhe se qëndron mes të dyja vendeve, gjegjësisht nuk e mbështet vetëm Ukrainën.
