Faruk Fatih Ozer, kreu i Crypto Exchange Thodex i cili akuzohet për krime të shumta përfshirë mashtrimin, udhëheqjen e një organizate kriminale dhe pastrim parash është dënuar me 11 mijë vite dhe 196 ditë burg nga gjykata turke.
I riu turk ishte shpallur në kërkim ndërkombëtar, pasi Gjykata e Lartë e Stambollit në vitin 2021, kishte lëshuar urdhër arresti ndaj tij, për veprat penale “Krijimi i organizatës kriminale” dhe “Mashtrimi me pasoja të rënda”. Ai akuzohet për mashtrim të 391 000 qytetarëve, nëpërmjet kriptomonedhave, mashtrim me dëm ekonomik 2 miliardë dollarë.
“Unë jam mjaft i zgjuar për të udhëhequr çdo institucion në Tokë. Kjo është e dukshme në këtë kompani që kam krijuar në moshën 22-vjeçare. Nuk do të kisha vepruar kaq amator nëse kjo do të ishte një organizatë kriminale”, tha ai para gjykatësit sipas mediave turke.
Ozer i arratisur prej muajit prill të vitit 2021 akuzohet në Turqi se në bashkëpunim me persona të tjerë ngriti një skemë mashtrimi nëpërmjet krijimit dhe shitjes së monedhave virtuale përmes kompanisë që vetë ai themeloi.
Sipas mediave turke, në momentin që është arratisur nga vendi, Faruk Ozer kishte me vete një server ku mbahen 108 milion dollar në formë kriptomonedhash. Në Turqi janë arrestuar disa bashkëpunëtorë të 28-vjeçarit me akuzën e mashtrimit.
Ozer u arrestua në 30 gusht në Shqipëri. Që prej vitit të kaluar nga autoritetet turke u kërkuar arrestimi i 28 vjeçarit, i cili ishte filmuar nga kamerat e aeroportit të Rinasit, gjithashtu edhe nga kamerat e disa hoteleve në Tiranë, por më pas humbi gjurmët, duke u kthyer në një nga personat më të kërkuar.
SHISH dhe Forcat Operacionale ndoqën për 5 javë Faruk Ozerin dhe dy shqiptarët. Jetesa e tij shtrihej me Elbasanit dhe resortit luksoz në Palasë. Për disa javë, Ozer ka shijuar plazhin e jugut në vend duke ndryshuar edhe pamje për të mos u njohur, me flokë të qethura dhe me mjekër. Ozer është identifikuar nga gjurmët e gishtërinjve që linte teksa pushonte në ambientet e plazhit luksoz. Bashkë me 28-vjeçarin u kap në Palasë të Himarës e bashkë me të u arrestua edhe Edevaldo Haxhiu, nipi i presidentit të Federatës Shqiptare të Futbollit, Armand Duka që akuzohet se e ndihmonte të shumëkërkuarin që t’i fshihej autoriteteve.
Më 17 nëntor, Gjykata e Elbasanit vendosi ekstradimin e shtetasit turk Faruk Ozer. Vendimi nuk u pranua dhe u apelua në Gjykatën e Apelit në Durrës, e cila ka dhe juridiksionin. Pasi seancat u shtynë disa herë, su mor vendimi që Faruk Ozer të ekstradohej duke iu dorëzuar autoriteteve turke.
