Jesse Kipf, 39 vjeç, nga Somerset, Kentaki, u dënua me gati shtatë vjet burg federal për vjedhje identiteti dhe falsifikim të vdekjes së tij në të dhënat e qeverisë. Kipf përdori kredencialet e vjedhura për të hyrë në sistemin e regjistrimit të vdekjes në Hawaii dhe u regjistrua si i vdekur në një përpjekje për të shmangur pagesat për mbështetjen e fëmijëve.
Sipas një deklarate nga Departamenti Amerikan i Drejtësisë, në janar 2023, Kipf përdori emrin e përdoruesit dhe fjalëkalimin e një mjeku nga një shtet tjetër për të falsifikuar vdekjen e tij. Më pas ai plotësoi formularin e certifikatës së vdekjes dhe e caktoi veten si certifikues mjekësor, duke përdorur nënshkrimin dixhital të atij mjeku.
Ky veprim lejoi që Kipf të shfaqej i vdekur në bazat e të dhënave të qeverisë amerikane, duke pastruar detyrimet e prapambetura të mbështetjes së fëmijëve, gjë që ai vetë e pranoi se ishte motivi kryesor i këtij akti të paligjshëm
Përveç kësaj, Kipf aksesoi rrjetet private të korporatave dhe sistemet qeveritare duke përdorur llogari të vjedhura dhe më pas ofroi akses në ato rrjete në tregjet e internetit të errët. Ai përdori gjithashtu një numër të rremë të sigurimeve shoqërore për të hapur një llogari krediti ose debiti në një institucion financiar.
Inspektori i FBI-së Michael E. Stansbury, i cili udhëhoqi hetimin, tha se i pandehuri “tani do të paguajë çmimin për hakimin e sistemeve të ndryshme kompjuterike dhe vjedhjen me qëllim të keq të identitetit për përfitime personale”. Dëmet e Kipf, duke përfshirë mbështetjen e papaguar të fëmijëve, vlerësohen në më shumë se 195,750 dollarë.
Kipf duhet të kryejë të paktën 85% të dënimit të dhënë nga gjykatësi i magjistraturës amerikane Robert Weir, që do të thotë se ai do të kalojë më shumë se pesë vjet e gjysmë në burg. Më pas ai do të jetë nën mbikëqyrje edhe për tre vite të tjera.
