Kontrabandonte emigrantë nga Iraku, por pasi u aksidentua gjatë goditjes me veturë të bankinave në autostradën Gjevgjeli – Shkup, një 51-vjeçar përfundoi në polici. Policët kishin njohuri se ai me veturën e aksidentuar, paraprakisht kishte transportuar emigrantët, disa prej të cilëve edhe i kishin kapur në afërsi të vendit të aksidentit, transmeton TV21.
Rasti ka ndodhur gjatë ditës së djeshme, rreth orës 17:30 në afërsi të Negotinës. Bëhet fjalë për 51-vjeçarin me iniciale H.A. nga Shkupi.
“Për shkak të dyshimeve se transportonte emigrantë, është kryer kërkim në terren dhe në afërsi të vendit janë gjetur tre emigrantë nga Iraku, prej të cilëve dy të mitur, të cilët kanë dëshmuar se janë bartur me automjetin në fjalë para se të ndodhte aksidenti. Personi është mbajtur në stacion policor dhe për rastin është njoftuar prokurori publik. Pas dokumentimit të rastit do të vijojë kallëzim përkatës”, thuhet mes tjerash në njoftimin e Ministrisë së Punëve të Brendshme.
