UEFA, shtëpia e futbollit evropian, ka njoftuar se ka iniciuar procedura disiplinore ndaj Federatës së Kosovës dhe asaj të Rumanisë, raporton Reuters, pasi më 15 nëntor futbollistët kosovarë braktisën ndeshjen në Bukuresht, duke u ankuar për thirrje raciste nga tifozët rumunë.
Federata e Futbollit të Kosovës ka paralajmëruar më 16 nëntor se do të dorëzojë ankesë në UEFA për, siç tha, “provokimet dhe sjelljet raciste” të tifozëve rumunë gjatë ndeshjes në Bukuresht, teksa Kombëtarja rumune e Futbollit ka falënderuar tifozët e saj që ishin të pranishëm gjatë ndeshjes kundër Kosovës.
“Kombëtarja rumune në Futboll dëshiron t’i falënderojë ata që ishin prezentë për mbështetjen e jashtëzakonshme dhe për sjelljen e tyre në ndeshjen me Kosovën, një ndeshje që do të mbetet në kujtesën e të gjithëve jo vetëm pse zgjati tri orë, por po ashtu si një shembull i unitetit dhe solidaritetit”, u tha në reagimin e Kombëtares rumune më 16 nëntor.
Ndeshja mes Rumanisë dhe Kosovës, që u braktis në minutën e 92-të, u zhvillua në kuadër të Ligës së Kombeve.
“Është për keqardhje gjesti i ekipit mysafir, që zgjodhi të largohej nga fusha pa pajtimin e referit, refuzoi ta përfundonte ndeshjen në fushë në frymën e lojës fer, që reflekton mungesë të respektit jo vetëm për futbollin, por edhe për ata si futbollistë profesionistë”, tha Kombëtarja e Rumanisë, shtetit që nuk e njeh pavarësinë e Kosovës.
