Një në tre fëmijë romë jetojnë në pragun e varfërisë. Sipas analizave të UNICEF, fëmijët në vend janë në rrezik më të lartë të varfërisë sesa të rriturit. Rreth 20 mijë fëmijë në vend nuk kanë qasje në sigurim shëndetësor, ndërsa çdo familje e dytë me një prind të vetëm është e varfër. Analizat e UNICEF tregojnë se më pak se 2 për qind e fëmijëve me aftësi të kufizuara ndjekin mësimin në shkollën fillore dhe atë të mesme. 14 mijë fëmijë nuk e ndjekin arsimin fillor, ndërsa mbi 22 mijë nuk e ndjekin arsimin e mesëm të detyrueshëm. 73 për qind e fëmijëve përjetojnë dhunë familjare. Përfaqësuesja e UNICEF në vend tha se sistemet aktuale në vend nuk punojnë mjaftueshëm për mbështetjen e fëmijëve të varfër.
“1 në 3 fëmijë jeton nën nivelin e varfërisë. Këto nuk janë vetëm statistika, këto janë thirrje për veprim. Varfëria e fëmijës është më shumë sesa mungesë e të ardhurave, është kufizim në kujdesin shëndetësor, në edukimin e tyre, zhvillimin e tyre dhe shanset e tyre për një të ardhme më të mirë. Këta fëmijë ngelen pas në arsim, kanë vështirësi të gjejnë punë më vonë në jetë dhe janë të pirur të rrisin familje të cilët gjithashtu do jetojnë në varfëri, duke vazhduar ciklin dhe duke rrezikuar kapitalin njerëzor të vendit. Sistemet aktuale në vend nuk janë të pajisura ti mbështesin fëmijët që jetojnë në varfëri”, deklaroi Lesli Miller, përfaqësuese e UNICEF. /Alsat.mk
