Vaksinimi bëhet i detyrueshëm për punëtorët e shtetit dhe disa sektorë privatë në SHBA

Presidenti amerikan, Joe Biden vendosi të enjten rregulla të reja të rrepta të vaksinës për punonjësit federalë, punëdhënësit e mëdhenj dhe stafin e kujdesit shëndetësor në një përpjekje gjithëpërfshirëse për të kontrolluar rritjen e fundit të rasteve me COVID-19.

Kërkesat e reja mund të zbatohen për deri në 100 milionë amerikanë, afërsisht dy të tretat e fuqisë punëtore amerikane dhe përbëjnë shtytjen më të fortë të liderit shtetëror deri më tani për të kërkuar vaksina për pjesën më të madhe të vendit, raporton cnn.

“Ne kemi qenë të durueshëm, por durimi ynë është dobësuar dhe refuzimi juaj na ka kushtuar të gjithëve”, tha Biden, duke iu drejtuar amerikanëve që ende refuzojnë të marrin një vaksinë pavarësisht dëshmive të shumta të sigurisë së tyre dhe miratimit të plotë të vaksinës Pfizer-BioNTech nga Administrata Amerikane e Ushqimit dhe Barnave, transmeton Telegrafi.

Ai tha se tek amerikanët e vaksinuar po rritej zemërimi me 80 milionë njerëz që nuk kanë marrë një vaksinë dhe po nxisin përhapjen e virusit. Dhe ai pranoi se hapat e rinj nuk do të siguronin një rregullim të shpejtë.

“Ndërsa Amerika është në gjendje shumë më të mirë sesa ishte shtatë muaj më parë kur mora detyrën, më duhet t’ju them një fakt të dytë: Ne jemi në një gjendje të vështirë dhe mund të zgjasë për një kohë”, tha Biden në një fjalim të hershëm në mbrëmje nga Shtëpia e Bardhë.

Në qendër të planit të ri të Biden është Departamentit të Punës që t’u kërkojë të gjitha bizneseve me 100 ose më shumë punonjës të sigurohen që punëtorët e tyre ose të vaksinohen ose testohen një herë në javë, një hap i vështirë që presidenti e ndërmori pas konsultimit me zyrtarët e administratës dhe avokatët e administratës. Kompanitë mund të përballen me mijëra dollarë gjobë për punonjësit nëse nuk respektojnë rregullat. /Telegrafi/