Në Gjykatën Themelore në Tetovë sot duhet të vazhdojë seanca gjyqësore me fjalët përfundimtare të Prokurorisë dhe mbrojtjes së të pandehurve, të cilët akuzohen për disa vepra penale lidhur me zjarrin në spitalin modular në shtator të vitit 2021 ku humbën jetën 14 persona.
Kjo është përpjekja e tretë për të pasur fjalë përfundimtare pasi seancat e 25 prillit dhe 10 majit u shtynë. Më 25 prill seanca u shtye për shkak të mungesës së njërit prej të akuzuarve, Florim Besimit dhe më 10 maj, për shkak të mosardhjes së avokatit të të akuzuarit Artan Etemi.
Gjykatësi Jordan Velkovski fillimin e seancës së sotme e caktoi në ora 10:00.
Procedura e provave në procesin gjyqësor përfundoi me dëshmitarët e fundit që u dëgjuan më 6 prill.
Ish-drejtorët, Florin Besimi dhe Artan Etemi, akuzohen për veprën penale “vepra të rënda kundër sigurisë së përgjithshme”, ndërsa mjeku Boban Vuçevski për “mosrespektim të rregullave shëndetësore gjatë epidemisë”. Spitali klinik, si person juridik, akuzohet për dy vepra penale – “shkaktim i rrezikut publik” dhe “mosrespektim të rregullave shëndetësore gjatë epidemisë”.
Në fillim të gjykimit ata theksuan se e kuptojnë akuzën, por se nuk ndihen fajtorë. Gjyqi filloi në dhjetor 2022. (INA)
