Lëvizja Vetëvendosje ka zyrtarizuar kandidaturën e Hajrulla Çekut për kryetar të Komunës së Prishtinës në zgjedhjet e ardhshme lokale.
Kandidatura e tij u miratua në mënyrë unanime nga qendra e VV-së në Prishtinë. Lajmin e bëri të ditur kryetari i degës së kësaj partie në kryeqytet, Arben Vitia.
“Kandidati ynë për kryetar të Prishtinës do të jetë Hajrulla Çeku. Vendimi është marrë në mënyrë unanime nga qendra e VV-së në Prishtinë”, tha Vitia.
Kryeministri dhe lideri i VV-së, Albin Kurti, e cilësoi Çekun si një “njeri të kulturës dhe patriot”, duke theksuar besimin se ai do të sjellë një frymë të re në qeverisjen lokale.
“Me Hajrulla Çekun, do ta bëjmë Prishtinën një qytet evropian, ku njerëzit jetojnë mirë dhe banojnë me dinjitet”, u shpreh Kurti.
Vetëvendosje, që fitoi zgjedhjet parlamentare me 42% të votave, synon ta rikthejë Prishtinën nën drejtimin e saj, pas katër vjetëve qeverisje nga Përparim Rama i LDK-së, i cili në vitin 2021 e mundi Arben Vitinë në balotazh.
