Vijon pa afat ora policore në Shqipëri, universitetet sërish ‘online’

0

Komitetit Teknik i Ekspertëve në Shqipëri ka vendosur të vijojë masat kufizuese në vend për të parandaluar përhapjen e pandemisë Covid 19.

Zv/ ministrja e Shëndetësisë Mira Rakacolli, në një dalje për mediat sot, bëri me dije se për një afat të pacaktuar do të vazhdojnë të jenë në fuqi masat aktuale të kufizimeve anti-Covid.

Rakacolli, megjithatë theksoi se situata është dinamike dhe nëse do të rëndohet, mund të vlerësohen masa të reja.

“Komiteti i Ekspertëve në mbledhjen e zhvilluar pak më parë mori vendimin për t’i vijuar këto masa. Do të vijojnë të jenë të ndaluara grumbullimet me më shumë se 10 persona, do të jetë në fuqi kufizimi i lëvizjeve nga ora 22:00 deri në 06:00 të mëngjesit, do të kufizohen baret dhe restorantet. Administrata do të vazhdojë të punojë nga shtëpia. Universitetet do të vazhdojnë ‘online’, shkollat do të vazhdojnë mësimin e kombinuar. Të gjitha këto masa do të jenë pa afat. Duhet theksuar që kjo situatë është dinamike, nëse do të rëndohet, mundet të vlerësohet”, tha Rakacolli.

Ndërkohë, Komiteti i Ekspertëve thotë se rastet me Covid janë të larta. Sipas mjekes Eugena Tominit, Tirana kryeson me numrin më të lartë të infeksioneve e pasuar nga Gjirokastra dhe Lezha.

Do të vazhdojë:

Të ndalohen grumbullimet me më shumë se 10 persona në vende të hapura dhe të mbyllura.

Të ndalohen mbledhjet partiake dhe tubimet.

Të ndalohen konferencat, ceremonitë e festave, ceremonitë martesore dhe organizimet përtej atyre familjare të ceremonive mortore, deri në një urdhër të dytë.

Kufizimi i lëvizjes nga ora 22:00 deri në orën 06:00, ka përjashtim vetëm për emergjencat dhe rastet e punës.

Kufizimi i bareve, restoranteve, përveç shërbimeve ‘delivery’.

Administrata me punën në shtëpi.

Mësimi ‘online’ në universitete.

Mësimi i alternuar në shkolla.