Presidentja e Kosovës, Vjosa Osmani ndodhet në Paris ku po merr pjesë në punimet e Samitit ndërkombëtar për veprim mbi inteligjencën artificiale (AI).
Osmani ka qenë e ftuar në darkën e shtruar nga presidenti Emmanuel Macron në pallatin Élysée, krahas liderëve të tjerë, drejtues të organizatave ndërkombëtare dhe figura të shquara nga sektori privat.
Sipas Presidentes së Kosovës këto momente forcojnë lidhjet diplomatike e ekonomike dhe hapin mundësi të reja për bashkëpunim.
“Së bashku me Presidentin Macron, Kryeministrin indian Narendra Modi, atë kanadez Justin Trudeau, e shumë liderë të tjerë botëror, si dhe liderë të disa prej kompanive më të mëdha botërore si Google, Oapen AI, Alibaba, etj, kishim mundësi të diskutojmë tema të rëndësishme në interes të qytetarëve që përfaqësojmë”, shkruan Osmani.
Ditën e sotme, Osmani është takuar edhe më zv/Presidentin amerikan J.D. Vance. Faqja zyrtare e Presidencës së Kosovës ka ndarë foto nga takimi mes tyre.
Gjatë takimit Presidentja shprehu mirënjohjen e thellë për aleancën me SHBA, duke konfirmuar përkushtimin për thellimin e bashkëpunimit në fusha të interesit të përbashkët. (A2 Televizion)
