Të krijohen kushte që prokuroria dhe drejtësia të bëjnë punën e tyre. Sipas VLEN kjo është zgjidhja pas rasteve të fundit që flasin për një drejtësi të korruptuar dhe të komprometuar. Duke folur për përgjegjësinë e anëtarit të Këshillit të prokurorëve Ixhet Memeti, njeri i afërt me ish pushtetin e BDI-së, nga VLEN thonë se premtimet e BDI-së për veting ishin vetëm një farsë. VLEN nuk janë për shkarkimin e Këshillit të prokurorëve dhe Këshillit gjyqësor, por të krijohen kushte për punën e tyre pa ndërhyrje politike.
“Z.Memeti, dikur njeriu i dytë më i fuqishëm në Këshillin e prokurorëve, vetëm para tre muajve deklaroi se nuk kishte bërë asgjë të paligjshme dhe na siguroi se e vërteta do të dilte. Ja ku jemi sot, e vërteta po del në shesh dhe krejtësisht ndryshe nga ajo që u tha. Në këtë vijë kanë qenë edhe deklaratat prej dy dekadash të BDI-së e cila sa herë që kapej në skandale, ftonte që ata të denoncohen në Prokurori. Pyesim në cilën prokurori? Te ajo Abaziane? Kur BDI-ja flet për veting, le të jemi të qartë, kjo është vetëm një farsë. Kur ajo flet për drejtësi, kjo është një gënjeshtër. e ardhmja jonë nuk mund të drejtohet mbi themelet e një drejtësie të korruptuar dhe të komprometuar. Qëllimi jonë si koalicion VLEN është që krijojmë kushte të nevojshme që si Prokuroria si gjyqësori të ketë kushte optimale për të ndjekur, për të bërë hetuesinë dhe për të bërë aktgjykime në bazë të fakteve, në bazë të dëshmive pa ndikim të politikës”, tha Fari Iseni, VLEN.
