Kryetari i PDSh-së Menduh Thaçi ka deklaruar se ai nuk do të merr pjesë në seancën e nesërme të Kuvendit ku pritet të votohet për shkarkimin e ministrave të ASH-së, Fatmir Mexhiti dhe Azir Aliu, për shkak qëndrimit të tyre pro kryetarit Arben Taravari, transmeton InfoShqip.
Siç mësojmë nuk do të jetë vetëm Thaçi ai i cili nuk do votojë për shkarkimin e ministrave, por edhe kryetari i Lëvizjes Populli Zejd Rexhepi si dhe deputeti Hysni Ismaili.
Sipas informacioneve që kemi ata kanë kushtëzuar votimin e tyre me sigurimin e disa funksioneve. Andaj, informacionet tona janë se Zejd Rexhepi është larguar nga vendi për në Turqi, ndërsa Ismaili për në Kinë.
Ndërsa, kryetari i Partisë Demokratike Evropiane, Arjanit Hoxha, ka bërë të ditur se deputeti i tyre, Bastri Bajrami, do të jetë nesër prezent në Kuvend dhe do të votojë shkarkimin e ministrave që mbështesin Taravarin në ASH dhe po ashtu do të votojë emërimin e ministrave të rinj të ASH-së që mbështesin Selën. Sipas kalkulimeve të fundit mungesa e tre deputetëve të lartëpërmendur si dhe mosvotimi i dy deputetëve të ASH-së përkrahës të Taravarit do të krijojnë problem se a do të realizohet plani i shkarkimeve. (INA)